شن الإعلامي أحمد شوبير، حارس مرمى الأهلي ومنتخب مصر السابق، هجوم قوي على لجنة الأندية في اتحاد الكرة بسبب العقوبات اللي تم فرضها على نادي الزمالك بعد أحداث المباراة الأخيرة ضد موردن سبورت.

وقال شوبير في تصريحات إذاعية النهاردة الأحد: «لجنة الأندية أعلنت عقوبات الجولة التاسعة من الدوري، والدنيا مقلوبة علشان عامل غرفة الملابس ولازم أقف هنا كتير، العامل اتغرم 95 ألف جنيه، وأنا مراهنت لو في أي مكان فيه دوري عنده نظام وانضباط، ماكانش حصل اللي شفناه».

وتابع شوبير: «أنا بالنسبة لي كل الناس سواسية، بس في الملعب كل واحد ليه دور: ده مدرب، ده دكتور، ده إداري  لكن عامل غرفة الملابس ملوش دور غير إنه يحضر ملابس اللاعبين  عمري ما شفت حد مسؤول عن غرفة الملابس في فريق أو منتخب يروح يعترض  ده مفيش في أي مكان.
وتابع :بعدين يقولوا له إيقاف 6 مباريات وغرامة 95 ألف جنيه، ويتغرم الزمالك 200 ألف جنيه، وكمان يمنعوا الجماهير اللي حضرت».

وأوضح شوبير: «على فكرة، اللائحة بتقول 3 مباريات إيقاف، لكن اللي عرفته إنه تعدى بالضرب على الولد اللي بيجيب الكور، وكمان تعدى على الحكام بالسب والقذف.
وواصل: إزاي يا جماعة تحطوا لوائح تحكم المسابقة عشان اللي حصل ده ما يتكرر؟ ده اللي بيحصل ده مرفوض. العامل ده مش هيدفع الغرامة، هيدفع منين؟ ونادي الزمالك أحاله للتحقيق، بس مش عارف العقوبة هتكون إيه. كان نفسي الزمالك يعلن العقوبة بشكل قوي».

وأضاف شوبير: «حاولت أكلم طه عزت، رئيس لجنة المسابقات، عشان يشرح لي القصة، لكن الحقيقة الموضوع مش لطيف وخرجنا عن النظام. من الأول كان لازم ما نضعش لوائح ما بيتنفذش. الموضوع ملوش لازمة، إحنا بلا ضبط ولا ربط».

واختتم شوبير منتقداً رابطة الأندية قائلاً: «إنتوا مش محترمين اللوائح اللي إنتوا حطيتوها ووزعتوها على الأندية لو كان كده، مفيش حد يزعل. بعدين أجي أقول عقوبات على لاعب أو مدرب وأنا أيدي مرتعشة وخايف من رد فعل الجمهور، لو مش قدها يبقى ما تتدخلش. الأمور غريبة جداً صالح جمعة قال كلمة لحكم في ممر غرفة الملابس في العراق، خد 6 شهور إيقاف».