تحدث ماجد سامي، مالك نادي وادي دجلة، عن موضوع الاحتراف في الأندية المصرية ودور الاتحاد المصري لكرة القدم في تنظيم الأمور المالية للأندية، وأكد أن البداية تكون من الاتحاد، حيث يجب أن يتم فرض معايير اللعب المالي النظيف على الأندية، بحيث لا يمكن لها أن تصرف أكثر من الأموال التي تحصل عليها من عوائد مالية.

وقال  ماجد سامي في تصريحات تلفزيونية : "لو الأندية اتفرض عليها تلتزم باللعب المالي النظيف، هتضطر تدفع كل التزاماتها أولًا سواء كانت ديونًا للاعبين أو مدربين أو ضرائب أو تأمينات اجتماعية وإذا التزمت الأندية بالقواعد دي، هتضطر تبيع بعض اللاعبين لتغطية التزاماتها المالية".

واستشهد سامي بمثال الزمالك وزيزو، قائلاً: "لو الزمالك مش مديون لحد، يبقى مفيش مشكلة  لكن لو هو مديون لفرق ومدربين ولاعبين، لازم الأول يدفع اللي عليه قبل ما يوقع مع لاعبين جدد. لو الزمالك كان مرغم يدفع التزاماتنا في مواعيدها، هيضطر يبيع زيزو، لكن عشان مش مرغم يدفع التزامات، الموضوع مش ماشي صح".

وأكد ماجد سامي: "أنا مش بهاجم الزمالك أو أي نادي، أنا بقول إن لو الأندية كلها، زي الأهلي والزمالك والإسماعيلي، التزمت بدفع مستحقاتها في مواعيدها، الموضوع ده هيحسن الاحتراف في مصر وهينهي كل المشاكل المالية في الأندية".

واختتم حديثه قائلاً: "الجمهور لازم يبقى فاهم لو الأندية ما دفعتش مستحقات لاعبيها في مواعيدها، المفروض يتم خصم نقاط منها لازم نطبق قواعد اللعب المالي النظيف علشان كل حاجة تبقى واضحة ومعروفة".