كشف خالد بيبو لاعب الأهلي ومنتخب مصر الأسبق عن كواليس ما قبل مباراة الأهلي والزمالك الشهيرة التي فاز بها الشياطين الحمر بسداسية وتألق فيها بيبو محرزا 4 أهداف.

وقال خالد بيبو في برنامج "حارس الأهلي" على قناة الأهلي: "أنا عندي واحد صاحبي اسمه محمد ياسين، وكنا مع بعض طول الوقت فمحمد قال لي أنا مش هروح الماتش الجاي أنت بقالك 3 ماتشات عمال تتشتم والجمهور بيهاجمك وانا ببقي قاعد مش عارف ارد على الناس عشان أنت مش احسن حاجة".

وتابع بيبو:  "قلتله أنا كنت كويس والماتش مهم، وقولتله روح وأنا هخلي كل واحد في الاستاد يبوس دماغك ، قال لي ي يعني أروح ، قولتله روح طبعا، انا كان عندي ثقة في نفسي، كمان قبلها بيوم جابني مانويل جوزيه قعد اتكلم معايا".

وأضاف: "جوزيه قال لي أنا عارف ان إنت الفترة اللي فاتت مفيش توفيق في الأهداف احنا بكرة هنلعب هنضعط على الزمالك من الاول من ضربة البداية هنضغط عليهم وقالي هنشتغل ازاي وقالي أنا داعم ليك وانا عارف انك عندك امكانيات كويسة جدا وهتكسبنا بكرة، هو اداني ثقة وجهزني للمباراة".