صرح توفيق السيد، نائب رئيس لجنة الحكام السابق، بأنه لم يكن للجنة أي تدخل أو علم بالقائمة الدولية للحكام التي تم إرسالها.

 وقال توفيق السيد: "القائمة دي شغل الناس اللي قبلنا، ولهم كل الاحترام والتقدير. إحنا ما تدخلناش فيها خالص، ولا شفناها من قريب أو بعيد. القائمة اتبعت حسب معايير معينة، وإحنا بنحترم اختياراتهم لأنهم كانوا على رأس المنظومة في الفترة دي."

وبالنسبة للمستحقات المالية للحكام، أوضح توفيق: "على حسب علمنا مفيش مستحقات متأخرة، بالنسبة للحكام الدوليين مستحقاتهم بتتأخر حوالي أربع أسابيع فقط، مش متأكد لو في حاجات متأخرة، بس في النهاية إحنا مش شغالين علشان المستحقات، كنا شغالين مع لجنة الحكام، والقرار كان عندهم."

وتابع توفيق: "الحكام اشتغلوا بجد، وكان في مجهود كبير من الكابتن رؤوف، اللي كان بيخليني أشتغل لحد الفجر، كنا بنشتغل على تعيينات الدوري الممتاز والمباريات في الأقسام التانية والثالثة، وكان في شغل كبير جدًا."

أما عن الحالات التحكيمية في الفترة اللي اشتغل فيها، قال توفيق: "بالنسبة للحالات الجدلية زي هدف رامي ربيعة الملغى في مباراة الأهلي والبنك الأهلي، كنا بنحلل الحالات دي بشكل رسمي، وفي رأيي الحكام اجتهدوا بشكل كبير وعملوا شغل محترم.

وأضاف: "إحنا ما قلناش حاجة جديدة، إحنا عملنا تحليل رسمي للحكام، وده كان جهد جماعي. الحكم اللي ألغى هدف ربيعة كان مقتنع بالقرار، وفي النهاية دي كانت قرارات الحكام، وده كان تحليلنا بكل احترام."

وفيما يخص بعض الحالات الأخرى، قال توفيق: "ما فيش ضربة جزاء للاتحاد السكندري في مباراته مع الأهلي، وضربة جزاء حسين الشحات كانت صحيحة، لجنة الحكام أيدت قرار الحكم محمد الحنفي في إلغاء هدف رامي ربيعة أمام البنك الأهلي وأخيرًا، ما فيش لقطة واضحة من أي كاميرا بتثبت مخالفة ضد ياسر إبراهيم من مدافع البنك الأهلي."