ميدو يعلق على حالة الجدل بشأن عدم تشجيعة الاهلى فى كأس العالم للاندية

وعبر صفحته الشخصية على موقع التواصل الاجتماعى إكس كتب ميدو معلقاً

حرص أحمد حسام ميدو لاعب الزمالك الاسبق التعليق على حالة الجدل فى الساعات الاخيرة الخاصة بتصريحاته التى تحدث فيها عن عدم تشجيع الاهلى فى كأس العالم للاندية.

وعبر صفحته الشخصية على موقع التواصل الاجتماعى إكس كتب ميدو معلقاً :

انا ابن #الزمالك وأكبر فخر ليا في حياتي اني ابن المدرج ابن الثالثه يمين بلعب في الزمالك من وانا عندي ٩ سنين وانا عيل صغير كنت بروح ب فانلة الزمالك في المواصلات علشان الناس كلها تعرف اني ناشئ في الزمالك بطاقتي وانا عيل صغير هي كارنيه اتحاد الكورة اللي مكتوب عليه اسم الزمالك..

تتلمذت على ايد مدربين عظماء علموني اني انتمي لفريقي بس وما أشجعش اي نادي ثاني في مصر بالذات إلا نادي الزمالك اي كان بيلاعب مين ولكن في نفس الوقت اتربيت اني احترم كل المنافسين واهنيهم لو كسبوا واباركلهم واقولهم هارد لك لو خسروا..

هو ده معنى الروح الرياضية بالنسبة لي!! لما اتسألت في الاستوديو هتشجع الاهلي في كاس العالم للاندية رديت بطبيعتي دون اي نفاق او كذب لان بكل بساطه مفيش حاجه في الدنيا تستاهل انك تكون كذاب ومنافق! اتفق معاكم ان التوقيت ما كانش مناسب وبعتذر لأي حد زعل اني قلت الكلام ده في حدث مهم يخص النادي #الأهلي وانا شايف الناس اللي زعلت بخصوص ان الوقت مش مناسب عندهم كل الحق..

اما لو اتسألت مليون مرة هتشجع اي نادي تاني في مصر غير الزمالك إجابتي هتكون هي هي عمرها ما هتتغير لغاية لما اموت..اما بخصوص الهجوم اللي بتعرضله فأنا عاذر الناس لانهم ممكن يكونوا اتعودوا على اجابات مختلفه في السنوات الاخيرة من ناس تصدروا المشهد في الاعلام وهما اكتر ناس بيأذوا المنافس في الخفاء واكتر ناس بتتمنى من قلبها خسارة المنافس من جواهم..

مش هرد على اي حد هاجمني لان بكل بساطه أنا في مرحلة في حياتي شايف ان مفيش حاجه في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش اكتر من كده!! مره ثانيه بعتذر اني كنت سبب في جدال قائم الايام اللي فاتت للاسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدا عقلية مشجع الكورة!!