إمام عاشور: مريت بأسبوع صعب بعد السوبر الأفريقي ووعدت رمضان بتعويضه بالمصري
كشف إمام عاشور لاعب النادي الأهلي ومنتخب مصر عن حزنه الكبير بعد خسارة السوبر الأفريقي من الزمالك.
وقال عاشور في تصريحات ببرنامج "حارس الاهلي": "أنا عديت بفترة صعبة لما خسرنا السوبر الافريقي ، وبعد الماتش روحت عملت عمرة ورجعت مع جمهور نادي الزمالك ، انا من النوعيات اللي محبش اخسر خالص وبتضايق جداً لو سالت اي حد مبحبش اخسر لا تمرين ولا ماتش".
وتابع: "عديت باسبوع صعب وكنا مستنين ماتش السوير عشان نثبت للناس اننا رقم واحد في مصر وافريقيا ، في حاجة حصلت كابتن محمد رمضان جالنا وبيتكلم معايا وقالي عاوزك تركز عندنا ماتشات مهمة ، قولتله ان شاء الله هنلاعب نادي الزمالك وباذن الله هنكسبهم ، قالي انت ازاي تفكر كدة وانت هتلاعب سيراميكا ومينفعش تفكر كدة تفكر الاول في سيراميكا وبعدين الزمالك والحمدلله ان ربنا استجاب دعواتي وفوز السوبر رجع للفرقة كلها الثقة".
وأضاف: "كنا مستنين ماتش زي دة لأن بالنسبالنا الخسارة في السوبر الافريقي كانت صدمة لينا ، والله اللاعيبة في السوبر الافريقي مأثرتش ، مفيش لاعيب هينزل ماتش ويكسل مفيش لاعيب هيعمل كدة ونقول البطولات كتير ، مكناش في يومنا والكرة مش مساعدنا اول مرة اشوف اننا كلنا منبقاش فرومة ومفيش لاعيب قادر يزق الفرقة لقدام ، والسوبر المصري كلنا ركزنا والحمدلله ادتنا دافع والحمدلله قدرنا نعدي الماتش ومحمد رضمان قريب من اللاعيبة".
