فجر إمام عاشور نجم النادي الأهلي عديد المفاجآت حول رحيله عن نادي الزمالك وأزمة نبيل عماد دونجا نجم القلعة البيضاء.
كما تطرق إمام عاشور الي نصيحة محمود الخطيب رئيس النادي الأهلي اتجاه جماهير نادي الزمالك.
وتحدث إمام عاشور عن بداياته في كرة القدم ورسوبه فى اختبارات النادي الإسماعيلي والتعاقد معه وعمره 9 سنوات في غزل المحلة.
بوابة البلد سبورت تسلط الضوء على أبرز تصريحات إمام عاشور نجم النادي الأهلي.
قال إمام عاشور عبر تصريحات تليفزيونية : شاركت بالصدفة في تدريب غزل المحلة بسبب نقص اللاعبين، وبعدها طالبوا والدي وأخي بالتعاقد معي وذهبت لاختبارات النادي الاسماعيلي مع مسعد عوض ولكنني لم اجتازها وذهبت لنادي غزل المحلة اثناء مشاركة أخي في اختبارات زعيم الفلاحين ولكنني شاركت بالصدفة في التدريب بسبب نقص اللاعبين وبعدها طالبوا وابدي وأخي بالتعاقد معي وأنا في سن التاسعة.وتابع إمام عاشور :
أنا أعترف بأخطائي وأنا أخطأت في حق رموز الأهلى واعتذرت لهم جميعا عن أي شيء بدر مني سابقا عند وجودي في الزمالك .
وقال إمام عاشور عن أزمته مع دونجا:
نحن إخوه ولا يصح أن يكون بيننا شماته، لأن ممكن أكون مكانه وأنا وهو أصدقاء منذ زمن، وكنا نلعب دورات كثير ضد بعض ويحدث بيننا ضرب ومشادات في الملعب وهذا طبيعي.
أضاف إمام عاشور :
كان فيه لقطة مجتش شيكابالا بيقولي أنا زعلان منك عشان بكلمك ومكنتش بترد ، قلتله ما أنا كلمتك ومردتش عليا برضه ، في اللقطة دي بقى دونجا كان بيدخل عليا جامد وعنده إنذار ، روحت لشيكابالا قولتله، خلي بالك هو عمال يدخل عليا جامد ، عشان هخليه ياخد إنذار تاني وأطرده .
وعن احترافه قال إمام عاشور :
انتقالي لميتلاند كان كوبري للانتقال إلى الأهلي؟ أقسم بالله لم يحدث وكنت حزين جداً من طريقة انتقالي لفريق ميتلاند ولكن الحمد لله ربنا عوضني بأحسن نادي في أفريقيا، أي لاعب يتمنى أن يلعب في النادي الأهلي
واستطرد إمام عاشور :
لما جالي أمير توفيق امضي والله ما بصيت في عقود ولا اتكلمنا في فلوس ، وانا لحد وقتنا هذا معرفش عقدي كام ، انا بتعامل معاملة في الأهلى كلها حب من المسؤلين وتقدير وحب كبير من الجمهور.
وقال إمام عاشور أيضا :
من ساعة ما جيت الأهلي معملتش أي حاجة ضد جمهور الزمالك ولاعيبة الزمالك .. بالعكس والكابتن الخطيب قالي في أول لقاء ركز بس في الملعب ومتخسرش جمهور الزمالك .
وعن عرض ميتلاند وهو لاعب في الزمالك قال إمام عاشور:
وأنا في الزمالك جالي كذا عرض منهم في إسبانيا ، مكنتش أعرف حاجة عن عرض ميتلاند، بس قررت أكمل وجددت في الزمالك ساعتها ومعرفش العقد اتوثق ولا لأ ، لقيتهم بيكلموني الساعة 12 بالليل عايزينك دلوقتي ، قالولي بالحرف الواحد انت هتمشي، في نادي اسمه ميتلاند هتروحه ، قلتلهم مفيش مشكلة، روحت تاني يوم النادي لقيت العقود وكل حاجة هما مجهزينها ومضيت وعملت بعدها اللقاء على قناة الزمالك.
وعن رحيله عن الزمالك قال إمام عاشور :
قلتلهم في الزمالك أنا راجع وعايز أرجع مش هكمل احتراف ، قالولي آه حاضر أسبوع جاب التاني ومحدش عايز يكلمني وأنا كل دا اللي بتكلم وبقولهم عايز أرجع ، لقيت حد مسؤل في النادي بيقولي أدفع الفلوس أنت 2 مليون دولار واخلص منهم وارجعلنا ببلاش.
وأسهب إمام عاشور :
مكنتش أعرف حاجة عن عرض ميتلاند ، كنت قبلها قررت أجدد في الزمالك ، بس مكنتش عارف العقد اتوثق ولا لأ .، بعدها وجدت عقود انتقالي لنادي ميتلاند جاهزة في الزمالك وطلبوا مني عمل اللقاء التلفزيوني الشهير وعند عودتي طلبت العودة للزمالك واستمريت شهر ونصف ولم يفاوضني أحد وبعد ذلك بدأ الأهلي التواصل معي وأبلغني وكيلي أحمد يحيى برغبة أمير توفيق في التواصل معي
وقال إمام عاشور نجم الأهلي عن زوجته:
زوجتي تحلل أدائي بعد المباريات وأثق في رأيها جداً "عشان بتفهم كورة أوي.
وقال إمام عاشور نجم الأهلي عن إختياره رقم 22 في الأهلي:
اخترت رقم 22 ولم أخف، نفسي خلال مشواري مع الأهلي أعمل ربع اللي أبو تريكة عمله، نفسي أقابل تريكة وكلمت سيف ابنه وقلت له، وإن شاء الله أقابله لما نروح قطر.
وقال إمام عاشور نجم الأهلي عن علاقته بكهربا:
عمري ما قابلت كهربا خارج الملعب قبل انتقالي للأهلي، ونفسي أعرف ايه الاحتفال ده أنا كنت بقلده ولغاية دلوقتي مش فاهم حاجة.
وقال إمام عاشور عن ترحيل كهربا من الإمارات:
موقف كهربا ورجوعه من الإمارات خلاني أعيط لأنه كان موقف صعب، وشوفت نفسي مكانه ومكنش في إيدينا حاجة نعملها بس حاولنا مع كابتن محمد رمضان بس كان قرار صح.
